3%／下地勇 歌詞

歌：下地勇

作詞：下地勇　作曲：下地勇

大概ぬ人や 生きでぃうー事う ぷからすてぃ思い
明日ん繋ぎいかでぃてぃどぅ考いうー
3％ぬ人ぬどぅ己や何ぬ為んが生きでぃーうーがーてぃ
頭う傾かしうー
大概ぬ人や やまかさぬ人からぬ恩義う感じ
うるう返さでぃてぃどぅ思いうー
3％ぬ人ぬどぅ 返しふぃーす 恩義う計算なしー
人んかい被うぁしうー

3％ゆ 君 のーばし思う?
oh! あんしぬむぬな?
あらだか まさーがん頭う 抱いしみすむぬな?

大概ぬ人や毎日ぴにつ汗ゆ流し
己し働きーどぅ生きでぃーうー
3％ぬ人ぬどぅ 働かれす身体ゆ持ちゅうてぃ
童子んだかり親ぬ銭しどぅ食いうー
大概ぬ人や君んかい手ゆ伸ばし
君が事う望まばまいじょうぶんてぃどぅ思いうー
3％ぬ人どぅ 君が事う 妬ぎなりザニフキてぃどぅ思いうー

3％ゆ 君 のーばし思う?
oh! いきゃらふたーな?
あらだか まさーがん 君が心う痛みしみすむぬな?

大概ぬ人や働かばん働かばん
富豪から無視されーどぅうーてぃ思いうー
3％ぬ人ぬどぅ他人ぬむてぃまい余りから持ちー
大富豪んどぅなりうー
大概ぬ人や己し決みらいん人生ん心病み
あまなーす世う望みーどぅうー
3％ぬ人ぬどぅ ういとぉー縛り
勝手ゆ許さーまてぃどぅ目や光りーうー

3％ゆ 君 のーばし思う?
oh! あんしぬむぬな?
あらだか 歪みーうー世う いぴっつぁやらばん 考いみーでぃな?

大概ぬ人や神む信じ
抱きがまーしー助きふぃーさまちてぃどぅ願いうー
3％ぬ人ぬどぅ己が外や何ゆまい
信じたっふぁにゃーんてぃどぅ思いうー
大概ぬ人や大世ぬ和合ゆ 心ぬ底から願いがましどぅうー
3％ぬ人ぬどぅ 誰がらとぅいつまい喧嘩ゆしーっでぃどぅ
きぎー回りゅう

3％ゆ 君 のーばし思う?
oh! いきゃらふたーな?
あらだか 何がらあすだかならんてぃ 考いしみす事な?

3％や 心配にゃーんな?
3％や いきゃらふたーな?
3％や 何まいあらんな?
3％ゆ 無視しうらでぃな?
3％や 見いん振さしーらいんな?
3％ゆ 許さーまな?
3％んかい 立ち向かいいかでぃな?
3％とぅ まーつきうらでぃな?

3％ゆ 君 のーばし思う?
3％ゆ 君 のーばし思う?